EKKIk 2024ko Batzar Orokorra bildu zuen Tolosan, iragan ekainaren 28an. Orain arteko ibilbideaz hausnartu zuten bertaratuek, eta lorpen handitzat jo zuten CISAC nazioarteko egile eskubideen agentziako kide bihurtzea, plataforma digital handiekin negoziazioak abiatu izan edota laurehun bazkideren bueltan ibiltzea eta euren milaka obra tresna digital berritzaile batekin kudeatzen hasi izana.
Izan ere, digitalizazioa izango da hurrengo urteetako erronka nagusia. Aldaketa hori, ordea, EKKIk egin gurako luke esentzia galdu barik: hurbileko tratua, aholkularitza bizkor bat, egileen arteko elkartasuna eta gardentasuna.
Bazkideen eta agentziaren arteko zubiak indartzea izango da, beraz, zereginetako bat aurrerantzean. EKKI ezagutaraztea eta leku guztietan egile eskubideak kudeatzeko beste modu bat badela aldarrikatzea izango da kanpora begirako beste lan bat.
Joan den maiatzaren 30ean Seulen bildutako CISACen Batzar Nagusiak EKKI behin-behineko kide gisa berretsi zuen. Albiste bikaina da, gurea bezalako erakunde sortu berri bat akuilatu egiten baitu bere lanean: gero eta agerikoagoa izateko lanean ari den sektore kulturala laguntzea.
CISACeko idazkaritza EKKIrekin harremanetan jarri da gure entitateak aurrera egiten segi dezan, CISACen eskakizunak denon artean aplika ditzagun eta sortzaileen eskubideen kudeaketa hobetu dezagun.
EKKIk jasotzen dituen kontsulten artetik bada errepikatzen den kontu bat. Beren literatur lanak edo horien zati bat lagatzeko aukerari buruz galdetu ohi dute idazleek. Gai horretaz gogoratzen dira lana itzuli behar dietenean, berrargitalpen bat egin nahi dutenean eta halakoetan.
Lehenik eta behin, idazleei ikusarazten diegu literatura-lanen kasuan, gainerako sorkuntza-lanen antzera, zenbait printzipio nagusi eduki behar direla kontuan. Era berean, gomendioa da ondo aztertzea gaia, idazlan bat erdi bahiturik edo erdi erabili ezinik gera ez dadin. Edizio-kontratu egoki bat da horretarako gakoa.
Baina goazen apurka-apurka, eta zentra dezagun gaia: ondare-eskubideak daude batetik, eta eskubide moralak bestetik.
